wildyaks
Wildyaks
>
སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ།
སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ།
སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ།
མཁས་དབང་དགེ་འདུན་ཆོས་འཕེལ་ཚང་གིས་གྲོག་མ་མིག་མེད་བདེ་བའི་ཆེད་དུ་རྒྱུགས། ས་འབུ་རྐང་མེད་བདེ་བའི་ཆེད་དུ་རྒྱུགས། མདོར་ན་འཇིག་རྟེན་ཐམས་ཅད་བང་འགྲན་ནས། གཅིག་ལ་གཅིག་འགྱོགས་བདེ་བའི་ཕྱོགས་སུ་རྒྱུགས། ཞེས་གསུངས་པ་ལྟར། ང་ཚོ་སྐྱེས་ཕོ་མོ་ཐམས་ཅད་ཀྱི་ཉིན་རེའི་བྱ་བཞག་ཐམས་ཅད་བདེ་སྐྱིད་ཐོབ་པའི་ཆེད་དུ་ཡིན་པ་ལས་སྡུག་བསྔལ་མྱོང་བའི་ཆེད་དུ་མ་ཡིན་པ་དང་། ང་ཚོས་གཉེན་སྒྲིག་བྱེད་པ་དང་ཁྱིམ་ཚང་སྐྱོང་བ། བྱིས་པ་སྐྱེ་བ་དང་བྱིས་པ་གསོ་སྐྱོང་བྱེད་པ། བྱིས་པ་སློབ་གྲྭར་སྐྱེལ་བ་ལ་སོགས་པའི་བྱ་བཞག་ཐམས་ཅད་བདེ་སྐྱིད་ཐོབ་པའི་ཆེད་དུ་ཡིན། ཡིན་ནའང་། ང་ཚོ་མང་པོ་ཞིག་གིས་བསམ་བློ་གཏོང་སྟངས་དང་སྐད་ཆ་བཤད་སྟངས། རྣམ་འགྱུར་སྟོན་སྟངས་སོགས་མ་འགྲིག་པར་བརྟེན། འདོད་པའི་བདེ་སྐྱིད་ཐོབ་པའི་ཚབ་ཏུ་མི་འདོད་པའི་སྡུག་བསྔལ་མྱོང་བཞིན་ཡོད། ལྷག་པར་དུ་ཞིང་འབྲོག་ས་ཁུལ་དུ་འཚོ་བ་སྐྱེལ་བཞིན་པའི་མ་ཡུམ་མང་པོ་ཞིག་ལ་དུས་ད་ལྟའང་གཏམ་བརྗོད་རང་དབང་དང་ཟ་འཐུང་རང་དབང་། འགྲོ་འདུག་རང་དབང་ལ་སོགས་པའི་གཞི་རྩའི་འགྲོ་བ་མིའི་ཐོབ་ཐང་ཙམ་ཡང་མེད་པའི་སྐད་ཆ་དང་རྩོམ་ཡིག་མང་པོ་སྐད་འཕྲིན་དང་ངོ་དེབ་ལ་སོགས་པའི་བོད་པའི་སྤྱི་ཚོགས་དྲྭ་ལམ་དུ་མཐོང་རྒྱུ་དང་ཐོས་རྒྱུ་ཡོད་པ་མ་ཟད།གསར་ལམ་གྲགས་ཅན་དབྱིན་ཇིའི་བྷིས་བྷིས་སུ་(BBC)ནང་དུའང་ཉེ་ཆར་བོད་མདོ་སྨད་རྒྱལ་རོང་དུ་བྱུང་བའི་བུད་མེད་ཅིག་ཁྱོ་ག་སྔོན་མས་མེ་བསྲེག་བཏང་བའི་དོན་རྐྱེན་དེའི་གནས་ཚུལ་ཐོན་ཡོད་པ་དང་། བོད་མི་མང་པོས་མེ་བསྲེག་གཏོང་མཁན་དེ་བོད་པ་མ་ཡིན་པའི་གནས་ལུགས་བཤད་ཀྱི་ཡོད་ཀྱང་། དོན་རྐྱེན་བྱུང་ས་དེ་བོད་ས་མིན་ཞེས་བཤད་ས་མི་འགྲོ་བས། ཁ་ནང་གི་རྨ་དེ་ཁ་ནང་ནས་སོས་དགོས་ཞེས་པའི་གཏམ་དཔེ་ཡོད་པ་ལྟར། ང་ཚོའི་སྤྱི་ཚོགས་ཀྱི་གནད་དོན་དེ་ང་ཚོ་རང་ཉིད་ཀྱིས་སེལ་ཐབས་བྱེད་ཐུབ་ན་ཤིན་ཏུ་ལེགས་པར་སེམས། སྔོན་བྱོན་མཁས་པ་ཚོས་གནད་དོན་སེལ་ཐབས་ཀྱི་ལམ་སྟོན་མང་པོ་གསུངས་ཡོད་པ་དཔེར་ན། རྗེ་ཙོང་བ་བློ་བཟང་གྲགས་པའི་ཞལ་ནས་རང་མ་དུལ་ན་གཞན་འདུལ་བའི་གནས་མེད་གསུངས་པ་དང་། བདག་ཉིན་ཆེན་པོ་གན་རྡིས་རང་གིས་མཐོང་ན་འདོད་པའི་སྤྱི་ཚོགས་ཀྱི་འགྱུར་བ་དེ་རང་སྟེང་ནས་འགྲོ་འཛུགས་དགོས་གསུངས་པ་ལྟར།ང་ཚོའི་ད་ལྟའི་གནས་བབས་དང་མ་འོངས་པའི་འདུན་ལམ་ལ་བསྒྱུར་བཅོས་གཏོང་འདོད་ན་སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ། །
དྲང་བདེན་དང་གནས་ལུགས། རྒྱུ་འབྲས་རྟེན་འབྱུང་གི་ལྟ་བ་རྣམས་གཞིར་བཞག་སྟེ་མ་ཡུམ་ཚོའི་བཀའ་དྲིན་ལ་བསམ་གཞིག་བཏང་བ་ཡིན་ན། འཇིག་རྟེན་འདིའི་སྟེང་དུ་མ་ཡུམ་རྣམས་ལས་ལྷག་པའི་བཀའ་དྲིན་ཆེ་བ་ཞིག་སུ་ལའང་མེད། དཔེར་ན་བདག་ཅག་གི་སྐྱབས་དང་མགོན་དུ་གྱུར་བའི་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་གཙོས་པའི་བསྟན་འཛིན་གྱི་སྐྱེས་བུ་ཐམས་ཅད་མ་ཡུམ་ལས་སྐྱེས་ཤིང་།མ་ཡུམ་ཀྱི་འོ་མས་གསོས་པ་དང་མ་ཡུམ་གྱི་གསོ་སྐྱོང་འོག་ཏུ་མཚར་ལོངས་བྱུང་བ་ཤ་སྟག་ཡིན་ཞིང་། འཇིག་རྟེན་དུ་མ་བྱོན་པའི་རྒྱལ་སྲས་བྱང་ཆུབ་སེམས་དཔའ་རྣམས་ཀྱང་མ་ཡུམ་རྣམས་ཀྱི་བྱམས་བརྩེ་དང་བཀའ་དྲིན་ལ་བརྟེན་ཏེ་འབྱུང་དགོས་པ་ནི་དོན་དངོས་ཀྱི་གནས་ཚུལ་ཡིན། དེ་ན་གཉེར་མས་ཁེངས་པའི་ཕྲུ་གུ་ཆུང་ཆུང་དེ་སྨྲ་ཤེས་ཤིང་དོན་གོ་བའི་མི་ཞིག་ཏུ་གསོ་སྐྱོང་བྱེད་མཁན་གཙོ་བོ་དེ་མ་ཡུམ་རྣམས་ཡིན་པ་དྲན་དགོས་པ་དང་། འབྱུར་འགྱུར་གྱི་མི་རབས་ཚ་རྒྱུད་རྣམས་ཀྱང་མ་ཡུམ་རྣམས་ཀྱི་བྱམས་བརྩིའི་འོག་ཏུ་མཚར་ལོངས་འབྱུང་དགོས་པས།ཁོང་ཚོའི་བློས་བཏང་ལ་ངོས་འཛིན་དང་སྙིང་སྟོབས་ལ་བརྩི་བཀུར་བྱེད་པ་ནི་གཡོལ་དུ་མེད་པའི་འོས་འགན་ཞིག་ཡིན། ང་ཚོས་མ་ཡུམ་རྣམས་དང་འདྲ་མཉམ་ཀྱིས་སྐྱིད་ན་སྐྱིད་གཅིག་དང་སྡུག་ན་སྡུག་གཅིག་བྱེད་ཐུབ་དགོས། དེ་ལྟར་བྱེད་ཐུབ་པ་ཡིན་ན་ང་ཚོས་ནམ་རྒྱུན་རང་མི་རིགས་ལ་ཡ་རབས་སྤྱོད་བཟང་། བྱམས་སྙིང་རྗེ་། གཞན་ཕན་ལྷག་བསམ། དྲང་བདེན་དང་གནས་ལུགས་ལ་དུང་བའི་མི་རིགས་ཤིག་ཡིན་ཞེས་པ་དང་། མི་རིགས་གཞན་གྱིས་ཀྱང་དེ་ལྟར་ངོས་འཛིན་བྱེད་ཀྱི་ཡོད་པ་དོན་ལ་གནས་པ་མ་ཡིན་ནམ། ང་ཚོས་ཁ་དོན་ཚིག་ལ་གནས་པ་ཞིག་བྱེད་འདོད་ན་རང་མགོ་རང་གིས་གཡོགས་ཏེ་སྡོད་རྒྱུ་མ་ཡིན་པར། གནས་ལུགས་དང་རྒྱུ་མཚན།རྒྱུ་འབྲས་རྟེན་འབྱུང་གི་ལྟ་བ་སོགས་དབང་དུ་བཞག་སྟེ་རང་ཉིད་ལ་བཀའ་དྲིན་ཆེས་ཆེ་བའི་མི་དེ་སུ་ཞིག་ཡིན་པ་བརྟག་དཔྱད་བྱས་པ་ཡིན་ན། མ་ཡུམ་རྣམས་ལས་ལྷག་པའི་བཀའ་དྲིན་ཆེ་བ་ཞིག་ཕལ་ཆེར་རྙེད་མི་སྲིད། དེ་ལྟར་ན་སྐྱེས་པ་ཚང་མ་བུད་མེད་རིང་ལུགས་པ་ཞིག་ཏུ་ཡིན་དགོས་པར་སྙམ།
སངས་རྒྱས་ཞེས་པའི་རྒྱ་གར་གྱི་བརྙན་འཕྲིན་ཟློས་གར་དེའི་ནང་དུ་བཅོམ་ལྡན་འདས་ཀྱིས་ཙུནྡ་ཞེས་པའི་ཁྱིམ་བདག་དེར། ཁྱིམ་པའི་འཚོ་བའི་ནང་དུ་བཟའ་ཟླ་ཕོ་མོ་གཉིས་འདྲ་མཉམ་ཡོང་བ་གལ་ཆེ་ཞིང་། བཟའ་ཟླ་གཉིས་མཛའ་ཞིང་མཐུན་པའི་ངང་འཚོ་བར་རོལ་བ་ཡིན་ན།ཁྱིམ་ཚང་དེས་བདེ་སྐྱིད་ཀྱི་དཔལ་ལ་ལོངས་སྤྱོད་ཐུབ་པ་མ་ཟད། བདེ་སྐྱིད་ཀྱི་དཔལ་དེ་ཡང་གཅིག་ནས་གཅིག་ཏུ་མཆེད་པར་འགྱུར་ཞིང་། མི་རྣམས་དགའ་བདེའི་དཔལ་ལ་རོལ་ཐུབ་པར་འགྱུར་བ་ཡིན་ནོ་ཞེས་གསུངས་པ་ལྟར། སྐྱེས་ཕོ་མོ་གཉིས་ཀྱིས་གཉེན་བསྒྲིགས་ཏེ་ཁྱིམ་གཅིག་ཏུ་འཛོམས་དགོས་པ་ནི་བཟའ་མི་གཉིས་ཀྱིས་འདྲ་མཉམ་གྱི་འཚོ་བ་བདེ་སྐྱིད་ལྡན་པ་ཞིག་སྐྱེལ་དགོས་པ་ཡིན། སྐྱེས་ཕོ་མོ་གཉིས་ཀྱིས་སྐྱིད་སྡུག་མཉམ་མྱོང་བྱེད་པར་ཐག་བཅད་དེ་ཁྱིམ་ཚང་གཅིག་ཏུ་འཛོམས་པའི་ཉིན་དེ་ནས་བཟུང་། རྒན་པར་གུས་བརྩི་དང་གཞོན་པར་བྱམས་སྐྱོང་ལ་སོགས་པའི་ཁྱིམ་ཚང་གི་བྱ་བཞག་ཐམས་ཅད་ལ་འདྲ་མཉམ་གྱིས་ནུས་པ་འདོན་པར་དམ་བཅས་པ་ཡིན། དེས་ན་ཁྱིམ་ཚང་སྐྱོང་བའི་འཚོ་བའི་ཁྲོད་དུ་བཟའ་མི་གཉིས་ཀྱིས་ཕན་ཚུན་བར་ལ་མཆོག་དམན་གྱི་དབྱེ་བ་མི་འབྱེད་པར།ཕོ་མོ་འདྲ་མཉམ་དང་ཁྱིམ་ཚང་མཉམ་སྐྱོང་གི་འདུ་ཤེས་བཟུང་སྟེ་འབད་བརྩོན་བྱེད་དགོས། དེ་ལྟར་བྱས་ན་ཁྱིམ་ཚང་གི་བྱ་བཞག་ཐམས་ཅད་བསྒྲུབ་སླ་ཞིང་འདོད་བློ་ཁེངས་པའི་འཚོ་བ་སྐྱིད་པོ་ཞིག་སྐྱེལ་ཐུབ་པ་ཡིན། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཁོ་ཧྥེ་ཨ་ནན་(Kofi Annan) མཆོག་གིས་ཕོ་མོ་འདྲ་མཉམ་ནི་རྒྱལ་ཁབ་གྱི་འཕེལ་རྒྱས་དང་ཞི་བདེ་ལ་ཧ་ཅང་གལ་ཆེན་པོ་རེད་ཅེས་གསུངས་པ་ལྟར། ང་ཚོས་ཁྱིམ་ཚང་གི་འཕེལ་རྒྱས་དང་ཞི་བདེའི་ཆེད་དུ་བཟའ་ཟླ་གཉིས་ཀྱི་དབང་ཚད་འདྲ་མཉམ་ཡིན་དགོས་ཤིང་། བཟའ་ཟླ་སུ་ཞིག་ཡིན་ཀྱང་བཟའ་རོགས་བྲན་དུ་བཀོལ་བའི་དབང་ཆ་མེད། ཁྱོ་ག་ལ་ཆུང་མའི་སྟེང་དུ་དཔོན་ཉམས་བསྟན་ཏེ་བཀའ་འབེབ་པ་དང་ཁོ་མོའི་འགྲོ་འདུག་ལ་ཚོད་འཛིན་བྱེད་པའི་ཐོབ་ཐང་མེད། ཁྱོ་ཤུག་སུ་ཡིན་ན་གཅིག་གིས་བཀོད་འདོམ་འོག་ཏུ་གཅིག་ཤར་བསྐྱོད་བྱེད་མི་དགོས། ཡིན་ནའང་། ཁྱིམ་ཚང་གི་འཕེལ་རྒྱས་དང་བཟའ་ཚང་གི་བདེ་སྐྱིད་ཀྱི་ཆེད་དུ།འཚོ་བའི་ཁྲོད་དུ་ཕན་ཚུན་ལ་བསམ་ཤེས་དང་གུ་ཡངས་བྱེད་དགོས་པ་དང་། སྐྱིད་སྡུག་མཉམ་མྱོང་གི་འཚོ་བ་སྐྱིད་པོ་ཞིག་སྐྱེལ་བའི་ཆེད་དུ་སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ།
མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཟུར་བ་ཁོ་ཧྥེ་ཨ་ནན་(Kofi Annan) མཆོག་གིས་ཕོ་མོ་འདྲ་མཉམ་ནི་དམིགས་བྱའི་ལས་དོན་སྒྲུབ་ཐབས་ཙམ་མ་ཡིན་པར། དེ་ནི་དབུལ་ཕོངས་ཀྱི་དཀའ་ངལ་སེལ་་བ་ལ་འགོག་རྐྱེན་མེད་པར་བཟོ་བའི་སྔོན་འགྲོའི་ཆ་རྐྱེན་ཞིག་ཡིན་པ་མ་ཟད།ཕོ་མོ་འདྲ་མཉམ་ནི་འཕེལ་རྒྱས་ཀྱི་བྱ་བ་ཡུན་གནས་དང་གོང་འཕེལ་དུའགྲོ་བའི་ལམ་ལུགས་བཟང་བོ་ཞིག་རེད་ཅེས་གསུངས་ཡོད་པ་ལྟར།ང་ཚོས་ཀྱང་ཁྱིམ་ཚང་གི་བདེ་སྐྱིད་དང་སྤྱི་ཚོགས་ཀྱི་འཕེལ་རྒྱས། བྱིས་པའི་མདུན་ལམ་གྱི་ཆེད་དུ་འཁོར་བའི་གཞི་མ་སྟེ། བོད་གངས་ཅན་གྱི་མ་ཡུམ་རྣམས་ཀྱིས་ཁྱིམ་ཚང་དང་སྤྱི་ཚོགས་བྱ་བཞག་གོང་སྤེལ་གྱི་ལས་དོན་ཁྲོད་དུ་ཞབས་འདེགས་སྔར་ལས་ལྷག་པ་བསྒྲུབ་ཐུབ་པའི་ཆེད་དུ་སློབ་གསོའི་གོ་སྐབས་ཆ་ཚང་བ་ཞིག་སྤྲོད་ཐུབ་པ་བྱེད་དགོས། ཡང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཟུར་བ་བྷན་ཁེ་མོན་མཆོག་གིས། ཕོ་མོ་འདྲ་མཉམ་གྱི་གནས་སྟངས་ཚད་མཐོན་པོ་ཡོད་པའི་རྒྱལ་ཁབ་ཚོའི་ནང་དུ་དཔལ་འབྱོར་འཕེལ་རྒྱས་ཀྱི་གནས་སྟངས་ཀྱང་ཚད་མཐོན་པོ་ཡོད་པ་དང་། ཚོང་ལས་ཀྱི་ཚོགས་སྡེ་ཚོའི་ངེས་སྟོན་ཚོགས་ཆུང་དུ་བུད་མེད་མང་བོ་ཞིག་ཡོད་ན་ཚོང་གི་ཡོང་སྒོ་བཟང་བ་དང་། བུད་མེད་ཀྱི་སྐུ་ཚབ་ཡོད་པའི་ཞི་བའི་གྲོས་མོལ་གྱི་གྲོས་ཆོད་རྣམས་ལ་ལམ་ལྷུང་ཡོད་པ་དང་། བུད་མེད་མང་བའི་གྲོས་ཚོགས་ཀྱིས་སློབ་གསོ་དང་འཕྲོད་རྟེན། ཁྲིམས་སྒྲིག་དང་དྲང་བདེན། བྱིས་པའི་བདེ་སྡུག་སོགས་ཀྱི་གནད་དོན་ལ་རྒྱ་ཆེ་ས་ནས་གཟིགས་རྟོགས་བྱེད་ཐུབ་ཀྱི་འདུག་ཅེས་གསུངས་འདུག་པས། ང་ཚོས་ཐུན་མོང་གི་ནུས་པ་གོང་འཕེལ་གཏོང་བ་དང་། དཔལ་འབྱོར་དང་འཕྲོད་བསྟེན་གྱི་གནས་བབ་ཇེ་བཟང་དུ་འགྲོ་བར་ང་ཚོས་མ་ཡུམ་རྣམས་ཀྱི་ཆོད་སེམས་དང་སྙིང་རུས་ལ་བརྟེན་དགོས་ཤིང་། ཁོང་ཚོར་སྐྱེས་པ་དང་འདྲ་མཚུངས་ཀྱི་རྣམ་དཔྱོད་ཡོད་པ་ཁས་ལེན་དགོས་པ་དང་། ཁོོོང་ཚོ་རང་ཉིད་ཀྱི་བསམ་འདུན་ལྟར་ཁོ་ཚོའི་འཇོན་ནུས་གོང་སྤེལ་དུ་གཏོང་བར་མཐུན་རྐྱེན་བསྐྲུན་དང་རྒྱབ་སྐྱོར་བྱེད་དགོས། དེ་ལྟར་བྱས་ན་ཁོ་ཚོའི་ལས་དབང་ལ་བསྒྱུར་བཅོས་གཏོང་སླ་བ་དང་ཁྱིམ་ཚང་དང་སྤྱི་ཚོགས་ཀྱི་གནས་སྟངས་ལ་འགྱུར་ལྡོག་འགྲོ་སླ་བ་ཡིན། གཙོ་བོ་སྐྱེས་པ་ཚོས་རང་ཉིད་གདོང་དམར་ཚང་གི་མ་ཡུམ་ཚོའི་མདུན་ལམ་གྱི་བཀག་རྡོ་རུ་ནམ་ཡང་མི་འགྱུར་བ་ཁག་ཁུར་བྱེད་དགོས་པ་ཡིན། གལ་སྲིད་དེ་ལ་ཁག་ཁུར་བྱེད་མ་ཐུབ་ན། གྱོང་ཁུར་མཁན་དེ་རང་དང་རང་གི་ནང་མི་ཡིན། མཁས་དབང་དགེ་འདུན་ཆོས་འཕེལ་ཚང་གིས་རང་གི་རང་དོན་ཡུལ་གྱི་སྤྱི་དོན་དང་། རྒྱལ་པོའི་རྒྱལ་སྲིད་སྤྲང་བོའི་འཚོ་ཐབས་སོགས། ཆེ་ཆུང་བྱ་བ་གང་དང་གང་བྱེད་ཀྱང་། མེད་དུ་མི་རུང་བ་ནི་བུད་མེད་ཡིན་ཞེས་གསུངས་པ་ལྟར། མ་ཡུམ་ཚོའི་བྱམས་བརྩེས་མ་བསྐྱངས་པའི་མི་ཞིག་དང་ནུས་པས་མ་ཁྱབ་པའི་བྱ་བ་ཞིག་མེད་པ་སེམས་ལྷོད་ལ་ཡོད་པའི་སྐབས་སུ། བློ་གཟུ་བོར་དཔྱད་ན་ངེས་ཤེས་སྐྱེ་ཐུབ་པ་ཡིན། ཨ་རིའི་ཕྱི་སྲིད་དྲུང་ཆེ་ཟུར་བ་ལྕམ་ཧེ་ལི་རིས་ཁུ་ལེན་ཊོན་(Hillary Clinton) མཆོག་གིས་འགྲོ་བ་མིའི་ཐོབ་ཐང་ནི་བུད་མེད་ཀྱི་ཐོབ་ཐང་ཡིན། བུད་མེད་ཀྱི་ཐོབ་ཐང་ཡང་འགྲོ་བ་མིའི་ཐོབ་ཐང་ཡིན་ཞེས་གསུངས་པ་ལྟར། ང་ཚོས་ཡོངས་ཁྱབ་འགྲོ་བ་མིའི་ཐོབ་ཐང་ཁ་ནས་གླེང་སྟེ་རང་ཁྱིམ་དུ་ཆུང་མའི་ཐོབ་ཐང་ལ་བརྩི་མེད་ལྡོག་རོལ་བཏང་ནས་བསྡད་ན་མི་འགྲིག་པར། རང་དང་རང་གི་ཁྱིམ་ཚང་དང་། སྤྱི་ཚོགས་ཀྱི་བདེ་དོན་གྱི་ཆེད་དུ་སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོར་པར་སྙམ།
མདོར་བསྡུས་ན། མི་ཞིག་འགྱེལ་ས་ནས་ཡར་ལངས་དགོས་ན་རྐང་བ་གཉིས་ཀྱི་སྟེང་དུ་ལངས་དགོས་པ་ལས་རྐང་བ་གཅིག་གི་སྟེང་དུ་ཡར་ལངས་མི་ཐུབ་ཅིང་། གལ་སྲིད་ལངས་ཐུབ་ནའང་བརྟན་པོ་སྡོད་མི་ཐུབ། ཁྱིམ་ཚང་ཞིག་ལ་མཚོན་ནའང་། བཟའ་མི་གཉིས་ཀྱི་འཇོན་ནུས་མཉམ་སྤོངས་ཀྱིས་ཁྱིམ་ཚང་གི་འཚོ་བ་ཡར་རྒྱས་སུ་གཏོང་དགོས་པ་ལས། བཟའ་ཟླ་གཅིག་ཁོ་ན་ལ་བརྟེན་ཏེ་ཁྱིམ་ཚང་གི་འཚོ་བ་ཡར་རྒྱས་སུ་གཏོང་རྒྱུ་ཁག་པོ་ཡིན། དེ་བཞིན་དུ་སྐད་ཡིག་རིག་གནས་ཀྱི་མཚོན་པའི་མི་རིགས་ཀྱི་འཚོ་གནས་ཉེན་ཁའི་གནས་སུ་ལྷུང་ཡོད་པ་ཞིག་ལ་མཚོན་ནའང་། ཐུན་མོང་གི་ནུས་པ་མཉམ་སྤོངས་ཀྱིས་མི་རིགས་ཀྱི་འཚོ་གནས་ཉེན་ཁ་ལས་སྐྱོབ་ཐབས་བྱེད་དགོས་པ་ལས། མི་ཁ་ཤས་ཤིག་གི་ནུས་པ་ལ་བརྟེན་ནས་མི་རིགས་ཀྱི་འཚོ་གནས་ཉེན་ཁ་ལས་སྐྱོབ་ཐུབ་པ་མ་ཡིན། དེས་ན་ང་ཚོས་བོད་ཀྱི་མ་ཡུམ་དག་གི་འཇོན་ནུས་མཐོར་འདེགས་སུ་གཏོང་བར་གཅིག་ཕན་གཅིག་གྲོགས་ཀྱི་ཚུལ་དུ་ངེས་པར་དུ་བསྒྲུབ་དགོས། ཨ་རིའི་སྲིད་འཛིན་ཟུར་བ་ཨོ་བྷ་མའི་སྐུ་ལྕམ་ (Michelle Obama) མཆོག་གིས་གལ་སྲིད་བུད་མེད་ཀྱི་འཇོན་ནུས་ལ་འགོག་རྐྱེན་བཟོ་བ་དང་དབུགས་བསུབ་གཏོང་བ། སྤྱི་ཚོགས་ལ་ཞབས་འདེགས་སྒྲུབ་པའི་གོ་སྐབས་འཕྲོག་པ་སོགས་བྱས་ན། རྒྱལ་ཁབ་གཅིག་ཀྱང་དོན་ངོ་མའི་ཡར་རྒྱས་སུ་འགྲོ་མི་ཐུབ།རྒྱུ་མཚན་ནི་བུད་མེད་ཀྱིས་འཛམ་གླིང་གི་མི་འབོར་གྱི་ཕྱེད་ཀ་ཟིན་ཡོད་པ་རེད་ཅེས་གསུངས་པ་ལྟར། བོད་ཀྱི་བུད་མེད་ཀྱང་བོད་པའི་མི་འབོར་གྱི་ཕྱེད་ཀ་ལས་བརྒལ་ཡོད་སྲིད་པས། ང་ཚོས་ཀྱང་བུད་མེད་ཀྱི་འཇོན་ནུས་ལ་འགོག་རྐྱེན་བཟོས་ཏེ་མི་སྡོད་པར་ཐུན་མོང་གི་ཕུགས་འདུན་ཞིག་གི་ཆེད་དུ་ང་ཚོ་བོད་པའི་སྐྱེས་པ་ཚང་མ་ངེས་བུད་མེད་རིང་ལུགས་པ་ཞིག་ཡིིན་དགོས་པར་སེམས་སོ།།
གཡག་རྒོད་རྩོམ་རིག་ཚོགས་ཆུང་གིས་ཕྱི་ལོ་༢༠༢༠་ལོའི་ཟླ་བ་༡༠་བའི་ཚེས་༡༤་ཡིན་སྤེལ།
Topic: སྐྱེས་པ་ཚང་མ་བུད་མེད་རིང་ལུགས་པ་ཞིག་ཡིན་དགོས་པར་སྙམ། གཡག་རྒོད་རྩོམ་རིག་ཚོགས་ཆུང་གིས་ཕུལ།
No comments found.
New comment
Name
Subject
Comment
Please copy this text: 51522302d615
Menu
གློག་ཀླད་ལས་འཆར། Computer Project
བྱིས་སྐྱོང་བསླབ་བྱ།
སྐད་ཡིག་བསླབ་བྱ། Quotes
བསླབ་བྱ་གྲགས་ཆེན། Famous Quotes
ང་ཚོའི་སྐོར། About us
བྱིས་སྐྱོང་སློབ་གསོའི་མན་ངག་གཅེས་བཏུས།
བྱིས་པའི་གླུ་གཞས། Children's songs
བྱིས་པའི་བརྙན་འཕྲིན། Videos
ཐ་སྙད་གསར་བ།new vocabulary
བོད་ཡིག་སྦྱོང་ས། Learning Tibetan
སྒྲ་ལྡན་བྱིས་སྒྲུང་། Stories on MP3
འདྲ་པར། Event Photos
ཚོང་ཁང་། Shopping
ལོ་རེའི་སྙན་ཐོ། Annual report
བྱ་འགུལ། Events
སྣ་ཚོགས། Variety
གཡག་རྒོད་དང་འབྲེལ་བའི་གསར་འགྱྱར། Wildyaks in the news
Search site
Search site
Contact
Administrator
416-453-9887
admin@wildyaks.com
Homepage
Site map
RSS
Print